Tuesday, August 14, 2012
ਦੁਨੀਆਂ ਸੱਚ ਆਖਦੀ ਹੈ .....
Sunday, August 5, 2012
ghazal....
ਗ਼ਮ ਬੇਸ਼ੁਮਾਰ ਦੇ ਗਿਆ ਮੈਨੂੰ ਉਹ ਦਾਨ ਵਿਚ ।
ਆਈ ਹੈ ਸਿਰਫ਼ ਦਰਦ ਨੂੰ ਹੀ ਰਾਸ ਇਹ ਜਗ੍ਹਾ ,
ਰੁਕਿਆ ਨਾ ਹੋਰ ਕੋਈ ਵੀ ਦਿਲ ਦੇ ਮਕਾਨ ਵਿਚ ।
ਇਤਬਾਰ ਕਰਕੇ ਜਾਲ਼ ਵਿਚ ਫ਼ਸ ਜਾਇਉ ਨਾ ਕਿਤੇ,
ਹੱਦੋਂ ਹੀ ਵੱਧ ਮਿਠਾਸ ਹੈ ਉਸਦੀ ਜ਼ੁਬਾਨ ਵਿਚ ।
ਆਵੇ ਨਾ ਪੈਰਾਂ 'ਤੇ ਕਦੇ ਇਸਦਾ ਮਧੋਲਿਆ ,
ਮੰਦਾ ਕਹੀਂ ਨਾ ਕੁਝ ਵੀ ਤੂੰ ਵੇਲੇ ਦੀ ਸ਼ਾਨ ਵਿਚ ।
ਚਿਹਰੇ 'ਤੇ ਬਸ ਨਕ਼ਾਬ ਹੈ ਬਖਸ਼ੰਦ ਹੋਣ ਦਾ ,
ਮਾਫ਼ੀ ਦਾ ਸ਼ਬਦ ਪਰ ਨਹੀ ਤੇਰੇ ਵਿਧਾਨ ਵਿਚ ।
ਮੈਂ ਲਰਜ਼ਦੀ ਇਕ ਬੂੰਦ ਹਾਂ ਕੋਈ ਨਦੀ ਨਹੀਂ ,
ਸ਼ਿੱਦਤ ਤੂੰ ਅਪਣੀ ਪਿਆਸ ਦੀ ਰੱਖੀਂ ਧਿਆਨ ਵਿਚ ।
ghazal....
ਮਨ ਦੇ ਅੰਦਰ ਰਹਿੰਦਾ ਹੈ ਪਰ ਸ਼ੋਰ ਜਿਹਾ ।
ਚਾਨਣ ਦਾ ਮੁੱਲ ਇਹਦੇ ਕਰਕੇ ਹੈ ਜੱਗ 'ਤੇ ,
ਦਿਸਦਾ ਹੈ ਇਹ ਨੇਰ੍ਹਾ ਜੋ ਮੁੰਹ -ਜ਼ੋਰ ਜਿਹਾ ।
ਮਾਣ ਕਰੀਂ ਨਾ ਟੁੱਟ ਜਾਣਾ ਹੈ ਇਸਨੇ ਵੀ ,
ਸਾਹਾਂ ਵਾਲਾ ਰਿਸ਼ਤਾ ਕੱਚੀ ਡੋਰ ਜਿਹਾ ।
ਸੱਚ ਕਹਿਣ ਤੋਂ ਅਕਸਰ ਰੋਕੀ ਜਾਂਦਾ ਹੈ ,
ਮਨ ਵਿਚ ਬੈਠਾ ਜੋ ਹਉਮੈ ਦਾ ਚੋਰ ਜਿਹਾ ।
ਧੜਕਣ ਬਣ ਕੇ ਸਾਹਾਂ ਵਿਚ ਤੂੰ ਵਸਦਾ ਸੀ ,
ਪਰ ਹੁਣ ਜਾਪੇਂ ਮੈਨੂੰ ਅਸਲੋਂ ਹੋਰ ਜਿਹਾ ।
ghazal...
ਜ਼ਿੰਦਗੀ ਦੁਸ਼ਵਾਰ ਹੈ ਤੇਰੇ ਬਿਨਾ ।
ਨੇੜਤਾ ਤੇਰੀ ਰਹੀ ਨਾ ਦੋਸਤੀ ,
ਸੁੰਨਾ ਜਿਉਂ ਸੰਸਾਰ ਹੈ ਤੇਰੇ ਬਿਨਾ ।
ਛਾਨਣੀ ਦਿਲ ਹੋ ਗਿਆ ਦੁੱਖ ਜਰਦਿਆਂ,
ਕੋਈ ਨਾ ਗ਼ਮਖਾਰ ਹੈ ਤੇਰੇ ਬਿਨਾ ।
ਮੇਰੇ ਵਿਹੜੇ ਹੁਣ ਵੀ ਆਉਂਦੀ ਹੈ ਬਹਾਰ ,
ਮਹਿਕ ਵੀ ਪਰ ਭਾਰ ਹੈ ਤੇਰੇ ਬਿਨਾ ।
ਧੂੰਏਂ ਵਾਂਗੂੰ ਉੜ ਗਈ ਫੁੱਲਾਂ ਦੀ ਆਬ ,
ਸੜ ਰਹੀ ਗੁਲਜ਼ਾਰ ਹੈ ਤੇਰੇ ਬਿਨਾ ।
ਹਿਜਰ ਦੀ ਇਸ ਖੇਡ ਦੇ ਵਿਚ ਦੋਸਤਾ ,
ਹਾਰ ਹੀ ਬਸ ਹਾਰ ਹੈ ਤੇਰੇ ਬਿਨਾ ।
Sunday, July 15, 2012
ghazal...
ਬੇਵਿਸ਼ਵਾਸੇ ਮੌਸਮ ਅੰਦਰ ਖ਼ੁਦ 'ਤੇ ਵੀ ਇਤਬਾਰ ਨਹੀ ਹੈ ।
ਡਰ ਲਗਦਾ ਹੈ ਇਹਨਾਂ ਕੋਲੋਂ ਆਉਂਦੇ ਨੇ ਜੋ ਦਰਦ ਵੰਡਾਵਣ,
ਰੂਹ ਤਕ ਪੱਛ ਜਾਂਦੇ ਪਰ ਦਿਸਦੀ ਹੱਥਾਂ ਵਿਚ ਤਲਵਾਰ ਨਹੀ ਹੈ ।
ਇਹ ਜਿਹੜੀ ਵਿਚਕਾਰ ਖੜੀ ਹੈ ਬਸ ਹਉਮੈ ਹੈ ਤੇਰੀ ਮੇਰੀ ,
ਓਦਾਂ ਸਾਡੇ ਵਿੱਚ -ਵਿਚਾਲੇ ਕੋਈ ਵੀ ਦੀਵਾਰ ਨਹੀ ਹੈ ।
ਲਗਦਾ ਹੈ ਜਿਓਂ ਪਲਕਾਂ ਉੱਤੇ ਚੁੱਕੀ ਫਿਰਦੀ ਹਾਂ ਮੈਂ ਪਰਬਤ ,
ਆਖਣ ਨੂੰ ਤਾਂ ਅੱਥਰੂਆਂ ਦਾ ਹੁੰਦਾ ਕੋਈ ਭਾਰ ਨਹੀ ਹੈ ।
ਇਹ ਨਾ ਸੋਚੀਂ ਕੰਡਿਆਂ ਨਾਲ ਰਿਹਾ ਨਾ ਅੱਜ ਕਲ੍ਹ ਰਿਸ਼ਤਾ ਕੋਈ ,
ਦਾਮਨ ਮੇਰਾ ਦੇਖਣ ਨੂੰ ਜੇ ਲਗਦਾ ਤਾਰੋ -ਤਾਰ ਨਹੀ ਹੈ ।
ਮੇਰਾ ਕਿੰਨਾ ਮੁੱਲ ਪਾਉਣਾ ਹੈ ਨਿਰਭਰ ਹੈ ਸਭ ਤੇਰੇ ਉੱਤੇ ,
ਖੋਟੇ ਸਿੱਕੇ ਵਾਂਗੂੰ ਹਾਂ ਮੈਂ ਇਸ ਗੱਲ ਤੋਂ ਇਨਕਾਰ ਨਹੀ ਹੈ ।
Tuesday, July 10, 2012
ghazal...
ਕਿਸੇ ਨੂੰ ਕੀ ਪਤਾ ਕਿਸ ਨੇ ,ਕਿਸੇ ਦਾ, ਕੀ ਗਵਾਇਆ ਹੈ ।
ਜੋ ਰੱਖੀਆਂ ਦੂਰੀਆਂ ਮੈਥੋਂ , ਦਿਖਾਈ ਬੇਰੁਖੀ ਏਨੀ,
ਇਹ ਦਿੱਤੀ ਹੈ ਸਜ਼ਾ ਖ਼ੁਦ ਨੂੰ ਕਿ ਤੂੰ ਮੈਨੂੰ ਸਤਾਇਆ ਹੈ ।
ਕੋਈ ਰਿਸ਼ਤਾ ਨਹੀ ਸਾਲਮ ਤੇ ਜੀਵਨ ਹੈ ਸਜ਼ਾ ਵਰਗਾ ,
ਸਦਾ ਇਹ ਰਾਜ਼ ਪਰ ਅਪਣਾ ਮੈਂ ਦੁਨੀਆਂ ਤੋਂ ਛੁਪਾਇਆ ਹੈ ।
ਦਿਸੇ ਹਰ ਚੀਜ਼ ਇਕ- ਦਮ ਸਾਫ਼ , ਐਸਾ ਚਾਨਣਾ ਦੇਵੀਂ ,
ਹਨੇਰਾ ਸੁੰਨੇ ਰਾਹਾਂ ਦਾ ਬੜਾ ਪਿੰਡੇ ਹੰਡਾਇਆ ਹੈ ।
ਜੇ ਆਉਣਾ ਹੈ ਤਾਂ ਇਕ ਸੁਫ਼ਨਾ ਜਿਹਾ ਬਣ ਕੇ ਹੀ ਤੂੰ ਆਵੀਂ ,
ਜ਼ਮਾਨੇ ਨੇ ਹਕ਼ੀਕ਼ਤ ਵਿਚ ਬੜਾ ਮੈਨੂੰ ਰਵਾਇਆ ਹੈ ।
ਲੁਕੋ ਕੇ ਦਰਦ ਅਪਣਾ ਮੁਸਕੁਰਾਉਣਾ ਹੈ ਬੜਾ ਔਖਾ ,
ਮੇਰਾ ਪਰ ਹੌਸਲਾ ਦੇਖੋ ਮੈਂ ਇਹ ਵੀ ਕਰ ਦਿਖਾਇਆ ਹੈ।
ghazal...
ਦੁੱਖ ਨਵਾਂ ਇਕ ਦਿਲ ਨੇ ਫੇਰ ਸਹੇੜ ਲਿਆ ।
ਦੋਸ਼ ਨਹੀਂ ਹੈ ਤੇਰਾ, ਹੋਰਾਂ ਵਾਂਗੂੰ ਜੇ
ਦਿਲ ਆਪਣੇ ਦਾ ਦਰਵਾਜਾ ਤੂੰ ਭੇੜ ਲਿਆ ।
ਸੁਣਿਐਂ ਉਹ ਵੀ ਭਟਕ ਰਿਹੈ ਅੱਜ ਕਲ ,ਜਿਸਨੇ
ਰਸਤਾ ਆ ਕੇ ਮੰਜਿਲ ਕੋਲ਼ ਨਿਖੇੜ ਲਿਆ ।
ਅੱਖ ਬਚਾ ਕੇ ਕੋਲੋਂ ਦੀ ਲੰਘ ਜਾਵੇ ਉਹ ,
ਲੱਖ ਦੁਆਵਾਂ ਕਰ ਸੀ ਜਿਸਦਾ ਨੇੜ ਲਿਆ ।
ਸੂਲੀ ਉੱਤੇ ਸਾਹ ਲਟਕਾ ਕੇ ਸੁਣਿਆ ਹੈ ,
ਜਦ ਵੀ ਲੋਕਾਂ ਤੇਰਾ ਕਿੱਸਾ ਛੇੜ ਲਿਆ ।
ਕੋਈ ਦੁਸ਼ਮਣ ਆ ਕੇ ਹੀ ਹੁਣ ਸਾਰ ਲਏ,
ਆਪਣਿਆਂ ਨੇ ਅਪਣਾ ਕੰਮ ਨਿਬੇੜ ਲਿਆ ।
ghazal....
ਥੋੜਾ ਜੇਹਾ ਪਰ ਦਿਲਾਂ ਦਾ ਰਾਬਤਾ ਤੂੰ ਰਹਿਣ ਦੇ ।
ਕਰ ਸਕਾਂ ਮੈਂ ਸੁਫਨਿਆਂ ਵਿਚ ਨਾਲ ਤੇਰੇ ਗੁਫ਼ਤਗੂ ,
ਨੀਂਦਰਾਂ ਦੇ ਨਾਲ ਏਨਾ ਵਾਸਤਾ ਤੂੰ ਰਹਿਣ ਦੇ ।
ਸੈਂਕੜੇ ਦੁੱਖਾਂ ਦੇ ਝੱਖੜ ਮੈਂ ਇੱਕਲੀ ਜਰ ਲਊਂ ,
ਯਾਦਾਂ ਦਾ ਬਸ ਨਾਲ ਮੇਰੇ ਕਾਫ਼ਲਾ ਤੂੰ ਰਹਿਣ ਦੇ ।
ਪੂੰਝ ਨਾ ਪਲਕਾਂ ਤੋਂ ਹੰਝੂ ਇਸ ਕਦਰ ਨਾ ਤਰਸ ਕਰ ,
ਦਿਲ ਤਾਂ ਐਵੇਂ ਢਾਰਸਾਂ ਹੈ ਭਾਲਦਾ ਤੂੰ ਰਹਿਣ ਦੇ ।
ਦੋਸਤੀ ਤੇ ਦੁਸ਼ਮਣੀ ਦੇ ਸਿਲਸਲੇ ਸਭ ਤੋੜ ਲੈ,
ਜੀਣ ਦਾ ਸਾਮਾਨ ਪਰ ਕੁਝ ਸਾਬਤਾ ਤੂੰ ਰਹਿਣ ਦੇ ।
ਬਿਖ਼ਰ ਜਾਵੇ ਹੋ ਕੇ ਖੰਡਰ ਫਿਰ ਕਿਤੇ ਮੇਰਾ ਵਜੂਦ ,
ਇਸ ਤਰਾਂ ਬਣ ਕੇ ਨਾ ਆਵੀਂ ਹਾਦਸਾ ਤੂੰ ਰਹਿਣ ਦੇ ।
ਜੇ ਸਜ਼ਾ ਦੇਣੀ ਹੈ ਮੈਨੂੰ ਹੋਰ ਲੱਭ ਰਸਤਾ ਕੋਈ ,
ਇੰਝ ਦਿਖਾ ਕੇ ਬੇਰੁਖ਼ੀ ਨਾ ਆਜ਼ਮਾ ਤੂੰ ਰਹਿਣ ਦੇ ।
Friday, May 11, 2012
ghazal....
ਸਾਹ ਮੁੱਕ ਚੱਲੇ, ਪਰ ਮੁੱਕੀ ਨਾ ਗ਼ਮ ਦੀ ਕਾਲੀ ਰਾਤ ਅਜੇ ਤੱਕ ।
ਕਿੰਨੀ ਵਾਰੀ ਕੋਸ਼ਿਸ਼ ਕੀਤੀ , ਪਰ ਮੇਰੇ ਤੋਂ ਛੱਡ ਨਾ ਹੋਈ ,
ਸੀਨੇ ਨਾਲ ਲਗਾਈ ਹੈ ਜੋ ਪੀੜਾਂ ਦੀ ਸੌਗਾਤ ਅਜੇ ਤੱਕ ।
ਯਾਦ ਤੇਰੀ ਦਾ ਚਾਨਣ ਹੀ ਬਸ ਦਰਦ ਦੀਆਂ ਵਿਰਲਾਂ 'ਚੋਂ ਝਾਕੇ ,
ਓਦਾਂ ਮੇਰੇ ਵਿਹੜੇ ਆਉਣੋ ਡਰਦੀ ਹੈ ਪਰਭਾਤ ਅਜੇ ਤੱਕ ।
ਸਮਝ ਨਹੀਂ ਆਉਂਦੀ ਹੁਣ ਇਸ ਮੌਸਮ ਨੂੰ ਕਿਹੜਾ ਨਾਮ ਦਿਆਂ ਮੈਂ ,
ਦਿਲ ਦੀ ਧਰਤੀ ਸੁੱਕੀ ਹੈ ਪਰ ਨੈਣਾ ਵਿਚ ਬਰਸਾਤ ਅਜੇ ਤੱਕ ।
ਸੀਨਾ - ਜ਼ੋਰੀ, ਠੱਗੀ - ਠੋਰੀ, ਡਾਕਾ - ਚੋਰੀ, ਰਿਸ਼ਵਤਖੋਰੀ,
ਕਿਹੜੇ ਰਸਤੇ ਉੱਤੇ ਦੱਸ ਤੁਰੀ ਨਾ ਆਦਮ ਜ਼ਾਤ ਅਜੇ ਤੱਕ ।
Wednesday, April 25, 2012
ghazal...
ਇਕਲਾਪੇ ਦੇ ਜੰਗਲ ਅੰਦਰ ਮਹਿਫ਼ਿਲ ਕੋਈ ਸਜਾਈਏ ।
ਮੇਰੇ ਇਸ ਵੀਰਾਨ ਸ਼ਹਿਰ ਵਿਚ ਤਨਹਾਈਆਂ ਦਾ ਪਹਿਰਾ,
ਜ਼ਖ਼ਮੀ ਦਿਲ ਦਾ ਹਾਲ ਅਵੱਲਾ ਕਿਸ ਨੂੰ ਬੈਠ ਸੁਣਾਈਏ ।
ਏਸ ਉਦਾਸੇ ਮੌਸਮ ਅੰਦਰ ਜੀਣਾ ਮੁਸ਼ਕਿਲ ਹੈ, ਪਰ
ਦੰਦਾਂ ਹੇਠਾਂ ਜੀਭ ਦਬਾ ਕੇ ਵਕ਼ਤ ਗੁਜ਼ਾਰੀ ਜਾਈਏ ।
ਲੜਦੇ ਲੜਦੇ ਪੀੜਾਂ ਨਾਲ ਗਵਾਚੀ ਰੂਹ ਦੀ ਸਰਗਮ ,
ਸਮਝ ਨਾ ਆਵੇ ਦਿਲ ਦੀ ਵੇਦਨ ਕਿਹੜੀ ਸੁਰ ਵਿਚ ਗਾਈਏ ।
ਸੂਰਜ ਬਣ ਕੇ ਨੇਰ੍ਹੇ ਨਾਲ ਗਿਆ ਨਾ ਸਾਥੋਂ ਲੜਿਆ ,
ਜੁਗਨੂੰ ਵਾਂਗਰ ਜੂਝਣ ਦਾ ਪਰ ਜੇਰਾ ਪਾਲੀ ਜਾਈਏ ।
ਜੋਗੀ ਵਾਲੀ ਫੇਰੀ ਜਗ 'ਤੇ ਅਲਖ ਜਗਾ ਤੁਰ ਜਾਣਾ ,
ਐਵੇਂ ਤੇਰੀ- ਮੇਰੀ ਦੇ ਵਿਚ ਹਉਮੈ ਨੂੰ ਭਰਮਾਈਏ ।
ghazal....
ਯਾਦਾਂ ਦੇ ਸਰਮਾਏ ਬਾਝੋਂ ਹੋਰ ਨਹੀਂ ਕੁਝ ਪੱਲੇ ਹੁਣ ।
ਗਹਿਰ ਜਿਹੀ ਹੈ ਦਿਸਹੱਦੇ ਤੱਕ ਧੁੰਦਲਾ ਜਾਪੇ ਚੌਗਿਰਦਾ ,
ਹੰਝੂਆਂ ਦੀ ਬਾਰਿਸ਼ ਮਗਰੋਂ ਵੀ ਧੂੜ ਨਾ ਬੈਠੇ ਥੱਲੇ ਹੁਣ ।
ਜੁਗਨੂੰ ,ਚੰਨ ,ਸਿਤਾਰੇ ਰੁੱਸੇ ਸਾਥ ਨਾ ਦਿੰਦਾ ਕੋਈ ਵੀ ,
ਮੰਜ਼ਿਲ ਦੇ ਵੱਲ ਜਾਂਦੇ ਸਾਰੇ ਰਾਹ ਨ੍ਹੇਰੇ ਨੇ ਮੱਲੇ ਹੁਣ ।
ਘੁਲ਼ ਕੇ ਸਾਰੇ ਦਰਦ ਪੁਰਾਣੇ ਅੱਥਰੂਆਂ ਦੀ ਜੂਨ ਪਏ,
ਜਦ ਨੈਣਾਂ ਵਿਚ ਆਉਂਦੇ ਨੇ ਤਾਂ ਫਿਰ ਨਾ ਜਾਂਦੇ ਠੱਲ੍ਹੇ ਹੁਣ ।
ਇਕ ਬੇਵੱਸ ਤੇ ਤਲਖ਼ ਸਮੁੰਦਰ ਰੂਹ ਦੇ ਅੰਦਰ ਤੜਪ ਰਿਹਾ,
ਗ਼ਮ, ਪੀੜਾਂ ਤੇ ਤਨਹਾਈਆਂ ਨੇ ਸਾਰੇ ਪੱਤਣ ਮੱਲੇ ਹੁਣ ।
ਧੁਰ ਅੰਦਰ ਤੱਕ ਦਿਲ ਸੜਦਾ ਹੈ ਉਸਦੇ ਤਪਦੇ ਬੋਲਾਂ ਨਾਲ ,
ਉਸਨੂੰ ਕਹਿਣਾ ਕਣੀਆਂ ਵਰਗੇ ਇਕ ਦੋ ਅੱਖ਼ਰ ਘੱਲੇ ਹੁਣ ।
ਸਾਹ ਰ਼ਗ ਤੋਂ ਵੀ ਨੇੜੇ ਹੈਂ ਤੂੰ ਏਦਾਂ ਵੀ ਨਾ ਮੂੰਹ ਮੋੜੀਂ ,
ਇਕ ਪਲ ਦਾ ਵੀ ਰੋਸਾ ਤੇਰਾ ਜਿੰਦ ਮੇਰੀ ਨਾ ਝੱਲੇ ਹੁਣ ।
ghazal....
ਨੇਰ੍ਹਿਆਂ ਸੰਗ ਲੜਨ ਨੂੰ ਜੁਗਨੂੰ ਅਸੀਂ ਫੜਦੇ ਰਹੇ ।
ਖੇਡ ਸੀ ਤਕਦੀਰ ਦੀ ਇਹ ਜਾਂ ਤਕਾਜ਼ਾ ਵਕ਼ਤ ਦਾ,
ਧੁੱਪਾਂ ਵਿਚ ਠਰਦੇ ਰਹੇ ਤੇ ਛਾਵਾਂ ਵਿਚ ਸੜਦੇ ਰਹੇ ।
ਪਰਖ਼ ਨਾ ਹੋਇਆ ਜਿਨ੍ਹਾਂ ਤੋਂ ਕੱਚ-ਸੱਚ ਵਿਸ਼ਵਾਸ ਦਾ ,
ਉਹ ਆਸਾਡੀ ਆਸਥਾ ਛੱਜਾਂ 'ਚ ਪਾ ਛੜਦੇ ਰਹੇ ।
ਘੜ ਲਏ ਲੋਕਾਂ ਨੇ ਪਹਿਲਾਂ ਰੱਬ ਆਪੋ -ਆਪਣੇਂ ,
ਫਿਰ ਖ਼ੁਦਾਈ ਵਾਸਤੇ ਆਪਸ ਦੇ ਵਿਚ ਲੜਦੇ ਰਹੇ ।
ਭੇਜਣਾ ਹੀ ਤੂੰ ਜੇ ਹੈ ਤਾਂ ਭੇਜ ਹੁਣ ਲਸ਼ਕਰ ਕੋਈ ,
ਸਿਦਕ਼ ਅੱਗੇ ਇੱਕਾ-ਦੁੱਕਾ ਗ਼ਮ ਕਦੋਂ ਖੜਦੇ ਰਹੇ ।
ਹੋਰ ਕੀ ਅਨਹੋਣੀਆਂ ਦੀ ਦੋਸਤਾ ਚਰਚਾ ਕਰਾਂ ,
ਨੀਂਦਰਾਂ 'ਚੋਂ ਸੁਫ਼ਨਿਆਂ ਦੇ ਅਕਸ ਵੀ ਝੜਦੇ ਰਹੇ |
Wednesday, March 28, 2012
ghazal...
ਕਰਨਾ ਏਂ ਤਾਂ ਏਨਾ ਤੂ ਉਪਕਾਰ ਕਰੀਂ ।
ਦੋਸਤ ਬਣ ਕੇ ਦਿਲ ਉੱਤੇ ਨਾ ਵਾਰ ਕਰੀਂ ।
ਡਰ ਜਾਵੇ ਜੋ ਸੁਣ ਕੇ ਜ਼ਿਕਰ ਹਵਾਵਾਂ ਦਾ ,
ਵੇਖੀਂ ਦਿਲ ਨੂੰ ਏਨਾ ਨਾ ਬੀਮਾਰ ਕਰੀਂ ।
ਹੋਵੇ ਨਾ ਪਛਤਾਵਾ ਅਪਣੇ ਅਮਲਾਂ 'ਤੇ ,
ਏਨੀ ਕਿਰਪਾ ਜੱਗ ਦੇ ਪਾਲਨਹਾਰ ਕਰੀਂ ।
ਲੁੱਟ ਲੈਂਦੇ ਨੇ ਇਹ ਅਕਸਰ, ਤੂੰ ਐਵੇਂ ਨਾ
ਮਿੱਠੇ ਬੋਲਾਂ ਤੇ ਬਹੁਤਾ ਇਤਬਾਰ ਕਰੀਂ ।
ਮੱਥੇ ਦੇ ਵਿਚ ਰੌਸ਼ਨ ਕਰ ਸੂਰਜ ਕੋਈ,
ਨ੍ਹੇਰੇ ਦੇ ਵਿਚ ਰੂਹ ਨੂੰ ਨਾ ਬੇ-ਜ਼ਾਰ ਕਰੀਂ ।
ਫੱਟ ਹਮੇਸ਼ਾ ਇਹਨਾਂ ਦਾ ਨਾਸੂਰ ਬਣੇ ,
ਬਹੁਤੀ ਤਿੱਖੀ ਨਾ ਸ਼ਬਦਾਂ ਦੀ ਧਾਰ ਕਰੀਂ ।
ਮਰ ਨਾ ਜਾਵੇ ਖਾਹਿਸ਼ ਤੇਰੀ ਉੱਡਣ ਦੀ ,
ਏਨਾ ਵੀ ਨਾ ਪਿੰਜਰੇ ਨਾਲ ਪਿਆਰ ਕਰੀਂ ।
ghazal...
ਫੇਰ ਤੇਰੀ ਯਾਦ ਨੂੰ ਅੱਜ ਸੀਨੇ ਲਾ ਕੇ ਵੇਖਿਆ ।
ਦਿਲ 'ਚ ਸੁੱਤੇ ਦਰਦ ਨੂੰ ਅੱਜ ਫਿਰ ਜਗਾ ਕੇ ਵੇਖਿਆ ।
ਉੱਠ ਗਿਆ ਇਤਬਾਰ ਹਰ ਇਕਰਾਰ ਵਾਲੇ ਲਫ਼ਜ਼ ਤੋਂ ,
ਵਾਅਦਿਆਂ ਨੇ ਇਸ ਤਰ੍ਹਾਂ ਕੁਝ ਆਜ਼ਮਾ ਕੇ ਵੇਖਿਆ ।
ਕੱਲ੍ਹ ਦੇ ਤੇ ਭਲਕ ਦੇ ਵਿਚਕਾਰ ਜਿੰਦ ਪਿਸਦੀ ਰਹੀ ,
ਅੱਜ ਦਾ ਵੀ ਹਰ ਸਿਤਮ ਪਿੰਡੇ ਹੰਢਾ ਕੇ ਵੇਖਿਆ ।
ਇਹ ਮੇਰੇ ਸ਼ਿਅਰਾਂ 'ਚ ਸ਼ਾਮਿਲ ਹੋ ਗਿਆ ਚੁਪ-ਚਾਪ ਹੀ,
ਦਰਦ ਨੂੰ ਸ਼ਬਦਾਂ ਤੋਂ ਮੈਂ ਜਦ ਵੀ ਲੁਕਾ ਕੇ ਵੇਖਿਆ ।
ਸਦਮਿਆਂ ਦੀ ਗਹਿਰ ਅੰਦਰ ਦੱਬਿਆ ਘੁਟਿਆ ਰਿਹਾ ,
ਮਨ ਦਾ ਪੰਛੀ ਜਦ ਕਦੀ ਅਰਸ਼ੀਂ ਉੜਾ ਕੇ ਵੇਖਿਆ ।
ਦੋ ਕਦਮ ਹੀ ਨਾਲ ਤੁਰਿਆ ਫੇਰ ਛੱਡ ਕੇ ਤੁਰ ਗਿਆ ,
ਹਮਸਫ਼ਰ ਜਦ ਵੀ ਕੋਈ ਅਪਣਾ ਬਣਾ ਕੇ ਵੇਖਿਆ ।
ghazal..
ਸ਼ਾਜਿਸ਼ਾਂ ਅਕਸਰ ਹਨੇਰਾ ਐਸੀਆਂ ਕਰਦਾ ਰਿਹਾ |
ਚਾਨਣੀ ਕੋਲੋਂ ਵੀ ਮੇਰਾ ਦਿਲ ਸਦਾ ਡਰਦਾ ਰਿਹਾ |
ਚੰਨ ਦੀ ਥਾਂ ਜੁਗਨੁੰਆਂ ਦੇ ਨਾਲ ਕਾਲੀ ਰਾਤ ਵਿਚ ,
ਕੀ ਪਤਾ ਤੈਨੂੰ ਕਿ ਮੇਰਾ ਕਿਸ ਤਰ੍ਹਾਂ ਸਰਦਾ ਰਿਹਾ |
ਸੋਚਿਆ ਸੀ ਤੁਰ ਪਵਾਂ ਪੈਰਾਂ 'ਚ ਭਟਕਣ ਬੰਨ੍ਹ ਕੇ ,
ਮੇਰਿਆਂ ਪੈਰਾਂ 'ਚ ਬੰਧਨ ਪਰ ਸਦਾ ਘਰ ਦਾ ਰਿਹਾ |
ਗੱਲ ਨਾ ਦਿਲ ਦੀ ਸੁਣੀਂ ਬਹਿ ਕੇ ਕਦੇ ਵੀ ਸਾਹਮਣੇ ,
ਉਹ ਮੇਰੇ ਜ਼ਜਬਾਤ ਦੀ ਬਸ ਪੈਰਵੀ ਕਰਦਾ ਰਿਹਾ |
ਭਰਮ ਕਿਧਰੇ ਟੁੱਟ ਨਾ ਜਾਵੇ ਮੇਰਾ, ਇਹ ਸੋਚ ਕੇ ,
ਜ਼ਹਿਨ ਅਪਣੀ ਸੋਚ ਤੇਰੇ ਹਾਣ ਦੀ ਕਰਦਾ ਰਿਹਾ|
ਫੁੱਲਾਂ ਵਰਗੇ ਰਿਸ਼ਤਿਆਂ ਦੀ ਲਾਸ਼ ਉਹ ਢੋਂਦਾ ਸੀ ,ਜੋ ,
ਮਹਿਕਾਂ ਵਰਗੇ ਰਿਸ਼ਤਿਆਂ ਦੇ ਨਾਮ ਸੀ ਧਰਦਾ ਰਿਹਾ |
ghazal....
ਸੋਚ ਦੀਆਂ ਅੱਖਾਂ 'ਤੋਂ ਡਰ ਦੀ ਐਨਕ ਅੱਜ ਉਤਾਰ ਕੇ ਦੇਖ ।
ਅੰਬਰ ਏਨਾ ਦੂਰ ਨਹੀਂ ਤੂੰ ਆਪਣੇ ਖੰਭ ਸੰਵਾਰ ਕੇ ਦੇਖ ।
ਬੀਤੇ ਵੇਲੇ ਨਾਲ ਸਦਾ ਹੀ ਕਿਉਂ ਕਰਦਾ ਤਕਰਾਰ ਰਹੇਂ ,
ਇਕ ਛਿਣ ਅਪਣੇ ਅੱਜ ਨੂੰ ਵੀ ਤੂੰ ਅਪਣੇ ਕੋਲ ਖਲ੍ਹਾਰ ਕੇ ਦੇਖ ।
ਡੁੱਬ ਨਾ ਜਾਵੇ ਅੱਥਰੂਆਂ ਵਿਚ ਤਾਰੂ ਇਹ ਦਰਿਆਵਾਂ ਦਾ ,
ਦਿਲ ਖ਼ਾਤਰ ਵੀ ਇਕ-ਅੱਧ ਸੁਫ਼ਨਾ ਨੈਣਾਂ ਵਿਚ ਸ਼ਿੰਗਾਰ ਕੇ ਦੇਖ ।
ਅਕਸਰ ਹੀ ਬੌਣੇ ਹੁੰਦੇ ਨੇ ਉੱਚੇ ਸ਼ਮਲੇ ਵਾਲੇ ਲੋਕ ,
ਅਪਣੇ ਅਨੁਭਵ ਨਾਲ ਕਦੇ ਤੂੰ ਇਹ ਵੀ ਸੱਚ ਨਿਤਾਰ ਕੇ ਦੇਖ ।
ਦੁਨੀਆਂ ਨੂੰ ਜਿੱਤਣ ਦੀ ਹਸਰਤ ਕਰਦੀ ਬੇਆਰਾਮ ਬੜਾ ,
ਰੂਹ ਦੇ ਚੈਨ-ਸਕੂਨ ਲਈ ਤੂੰ ਅਪਣਾ ਆਪਾ ਹਾਰ ਕੇ ਦੇਖ ।
ਉਸਦੇ ਦਿਲ 'ਚੋਂ ਹਿਜਰਤ ਕਰ ਕੇ ਜਿੱਦਾਂ ਯਾਦ ਗਈ ਤੇਰੀ ,
ਤੂੰ ਵੀ ਅਪਣੇ ਦਿਲ 'ਚੋਂ ਇਕ ਪਲ ਉਸਦੀ ਯਾਦ ਵਿਸਾਰ ਕੇ ਦੇਖ ।
ghazal...
ਮਨ ਦੇ ਵਿੱਚ ਹਮੇਸ਼ਾ ਇੱਕ ਮਲਾਲ ਰਿਹਾ|
ਮੇਰਾ ਹੋ ਕੇ ਤੂੰ ਨਾ ਮੇਰੇ ਨਾਲ ਰਿਹਾ ।
ਹਰ ਬੰਦੇ ਵਿਚ ਦੋਸ਼ ਦਿਖਾਈ ਦਿੰਦੇ ਨੇ ,
ਅਪਣੀ ਅੱਖ ਵਿਚ ਤੱਕਣਾ ਬਹੁਤ ਮੁਹਾਲ ਰਿਹਾ ।
ਖ਼ੁਸ਼ੀਆਂ ਨੇਂ ਤਾਂ ਸਾਰੇ ਨਾਤੇ ਤੋੜ ਲਏ ,
ਗ਼ਮ ਮੇਰੇ 'ਤੇ ਸਾਰੀ ਉਮਰ ਦਿਆਲ ਰਿਹਾ ।
ਇਹ ਰਿਸ਼ਤਾ ਵੀ ਖੌਰੇ ਕੈਸਾ ਰਿਸ਼ਤਾ ਹੈ ,
ਦੂਰ ਰਿਹਾ ਉਹ ਫਿਰ ਵੀ ਮੇਰੇ ਨਾਲ ਰਿਹਾ ।
ਔਖੇ-ਸੌਖੇ ਕੱਟ ਲਈ ਹੈ ਜੂਨ ਜਿਹੀ ,
ਇਹ ਨਾ ਪੁੱਛੀਂ ਬਿਨ ਤੇਰੇ ਕੀ ਹਾਲ ਰਿਹਾ ।
ਯਾਦਾਂ ਦਾ ਅੰਬਾਰ ਪਿਆ ਜੋ ਮਨ ਅੰਦਰ,
ਤਨਹਾਈ ਵਿਚ ਬਣਿਆਂ ਮੇਰੀ ਢਾਲ ਰਿਹਾ ।
ਸੂਖ਼ਮ ਗੀਤ ਜਿਹਾ ਸੀ ਜੀਵਨ ਤੇਰੇ ਨਾਲ,
ਤੇਰੇ ਪਿੱਛੋਂ ਇਸ ਵਿਚ ਸੁਰ ਨਾ ਤਾਲ ਰਿਹਾ ।
ਮਨ ਦਾ ਪੰਛੀ ਬਿਹਬਲ ਸੀ ਪਰਵਾਜ਼ ਲਈ ,
ਪੈਰਾਂ ਦੇ ਵਿਚ ਫ਼ਰਜ਼ਾਂ ਦਾ ਪਰ ਜਾਲ ਰਿਹਾ ।
Thursday, February 9, 2012
ghazal...
ਦੁੱਖਾਂ ਦਾ ਸਾਮਾਨ ਬੜਾ ਹੈ |
ਦਿਲ ਤਾਂਹੀ ਪਰੇਸ਼ਾਨ ਬੜਾ ਹੈ |
ਕਿੰਨਾ ਮੁਸ਼ਕਿਲ ਹੋਇਆ ਜੀਣਾ,
ਲਗਦਾ ਸੀ ਆਸਾਨ ਬੜਾ ਹੈ |
ਲੈ ਤੁਰਿਆ ਦਿਲ ਓਧਰ ਕਿਸ਼ਤੀ ,
ਜਿਸ ਪਾਸੇ ਤੂਫ਼ਾਨ ਬੜਾ ਹੈ |
ਮੈਂ ਤੇਰਾ ਸੁਫ਼ਨਾ ਬਣ ਜਾਵਾਂ ,
ਸੀਨੇ ਵਿਚ ਅਰਮਾਨ ਬੜਾ ਹੈ |
ਦਿਸਹੱਦੇ ਤੱਕ ਘੁੱਪ ਹਨੇਰਾ ,
ਰਸਤਾ ਵੀ ਵੀਰਾਨ ਬੜਾ ਹੈ |
ਚੰਨ ਤੇ ਕਬਜਾ ਕਰਨਾ ਚਾਹੇ ,
ਇਹ ਮਨ ਬੇਈਮਾਨ ਬੜਾ ਹੈ |
ਭਰਮ ਦੀ ਉਂਗਲ ਪਕੜੀ ਰੱਖੇ,
ਦਿਲ ਮੇਰਾ ਨਾਦਾਨ ਬੜਾ ਹੈ |
ਪੈਰੀਂ ਫ਼ਰਜ਼ਾਂ ਦੀ ਬੇੜੀ ,ਉਂਝ
ਉੱਡਣ ਲਈ ਅਸਮਾਨ ਬੜਾ ਹੈ |
ਮੇਰੀ ਅੱਖ ਜੇ ਨਮ ਹੈ ਇਸ ਵਿਚ ,
ਤੇਰਾ ਵੀ ਅਹਿਸਾਨ ਬੜਾ ਹੈ |
ghazal...
ਗ਼ਮ ਦੇ ਮਾਰੇ ਮੁਖੜੇ 'ਤੇ ਮੁਸਕਾਨ ਸਜਾਈ ਫਿਰਦੇ ਹਾਂ |
ਦਿਲ ਦੇ ਵਿਚ ਅਰਮਾਨਾਂ ਦਾ ਸ਼ਮਸ਼ਾਨ ਛੁਪਾਈ ਫਿਰਦੇ ਹਾਂ |
ਜ਼ਖ਼ਮ ਨਜ਼ਰ ਆਵੇ ਜੇਕਰ ਤਾਂ ਉਸਦਾ ਕੋਈ ਇਲਾਜ ਕਰੇ,
ਇਸਦਾ ਕੋਈ ਇਲਾਜ ਨਹੀਂ ਜੋ ਰੋਗ ਲਗਾਈ ਫਿਰਦੇ ਹਾਂ |
ਅੱਧੀ-ਅੱਧੀ ਰਾਤੀ ਉਠ ਕੇ ਚਾਨਣੀਆਂ ਤੋਂ ਪੁੱਛੇ ਰਾਹ,
ਇਕ ਪਰਛਾਵੇਂ ਪਿੱਛੇ ਐਵੇਂ ਵਾਂਗ ਸ਼ੁਦਾਈ ਫਿਰਦੇ ਹਾਂ |
ਪੀੜ ਕਿਤੇ ਇਹ ਟੁੱਟੇ ਜੇਕਰ ਸੁੱਚੇ ਮੋਤੀ ਕਰੀਏ ਦਾਨ ,
ਸਹਿ ਨਾ ਹੋਵੇ ਇਹ ਦੁਖੜਾ ਜੋ ਦਿਲ ਨੂੰ ਲਾਈ ਫਿਰਦੇ ਹਾਂ |
ਉਮਰਾ ਦਾ ਸੂਰਜ ਡੁੱਬਣ ਤਕ ਪੂਜਾ ਇਸਦੀ ਕਰਨੀ ਹੈ ,
ਸੱਜਣਾ ਤੇਰੇ ਬਿਰਹਾ ਨੂੰ ਭਗਵਾਨ ਬਣਾਈ ਫਿਰਦੇ ਹਾਂ |
ਕਾਲ਼ੀ-ਬੋਲ਼ੀ ਰਾਤ ਲਿਖੀ ਹੈ ਭਾਵੇਂ ਲੇਖਾਂ ਅੰਦਰ ਤਾਂ ,
ਦਗ-ਦਗ ਕਰਦਾ ਸੂਰਜ ਐਪਰ ਤਲੀ ਟਿਕਾਈ ਫਿਰਦੇ ਹਾਂ |
ਇਸ਼ਕ਼ ਮੇਰੇ ਦੀ ਪਤਝੜ ਅੱਗੇ ਹਾਰ ਨਾ ਜਾਵੇ ਸਿਦਕ਼ ਮੇਰਾ ,
ਸੁਹਲ ਜਿਹੀ ਇਕ ਆਸ ਦੀ ਤਿਤਲੀ ਉਂਗਲ ਲਾਈ ਫਿਰਦੇ ਹਾਂ |
Wednesday, February 1, 2012
ghazal...
ਹਰ ਕਦਮ 'ਤੇ ਹੀ ਸਤਾਇਆ ਹੈ ਬੜਾ |
ਜ਼ਿੰਦਗੀ ਨੇ ਆਜ਼ਮਾਇਆ ਹੈ ਬੜਾ ।
ਬਿਨ ਤੇਰੇ ਬਨਵਾਸ ਹੀ ਕੱਟ ਹੋ ਰਿਹੈ ,
ਜਾਪਦਾ ਘਰ ਵੀ ਪਰਾਇਆ ਹੈ ਬੜਾ |
ਮਿਟ ਨਾ ਸਕਿਆ ਮੇਰੇ ਦਿਲ ਤੋਂ ਫੇਰ ਵੀ ,
ਤੇਰੇ ਚਿਹਰੇ ਨੂੰ ਮਿਟਾਇਆ ਹੈ ਬੜਾ ।
ਬਖ਼ਸ਼ ਦੇਵੇਗਾ ਮੇਰੇ ਸਾਰੇ ਗੁਨਾਹ ,
ਰਹਿਮਦਿਲ ਉਹ ਤਾਂ ਖ਼ੁਦਾਇਆ ਹੈ ਬੜਾ |
ਸੰਭਲ ਕੇ ਆਵੀਂ ਜ਼ਰਾ ਐ ਚਾਨਣੀ ,
ਨੇਰ੍ਹਿਆਂ ਨੇ ਨੇਰ੍ਹ ਪਾਇਆ ਹੈ ਬੜਾ |
ਝੁਲਸਿਆ ਚਿਹਰਾ ਦਿਸੇ ਜ਼ਜਬਾਤ ਦਾ ,
ਦਿਲ ਮੇਰਾ ਗ਼ਮ ਨੇ ਧੁਖ਼ਾਇਆ ਹੈ ਬੜਾ |
ਰੋਸਿਆਂ ਦੀ ਤਾਬ ਨਾ ਮੱਠੀ ਹੋਈ ,
ਹੱਥ ਬੰਨ੍ਹ ਤੈਨੂੰ ਮਨਾਇਆ ਹੈ ਬੜਾ |
Monday, January 9, 2012
ghazal...
ਚਾਨਣ ਦੇ ਪਰਛਾਵੇਂ ਤੋਂ ਵੀ ਡਰਦਾ ਹੈ |
ਓਦਾਂ ਤਾਂ ਦਿਲ ਸੂਰਜ ਦੀ ਚਾਹ ਕਰਦਾ ਹੈ |
ਦੋਸ਼ ਪਰਾਇਆਂ ਸਿਰ ਐਵੇਂ ਹੀ ਧਰਦੇ ਨੇ ,
ਬੰਦਾ ਅਕਸਰ ਆਪਣਿਆਂ ਤੋਂ ਹਰਦਾ ਹੈ |
ਧੁੰਦਲਾ ਜਾਪੇ ਮੈਨੂੰ ਅਪਣਾ ਸੂਰਜ ਵੀ ,
ਤੇਰੇ ਨੇਰ੍ਹੇ ਵਿੱਚੋਂ ਚਾਨਣ ਝਰਦਾ ਹੈ |
ਨਿਭਣਾ ਏਂ ਤਾਂ ਨਿਭ ਸਾਰੇ ਦਾ ਸਾਰਾ ਤੂੰ ,
ਝੂਠੇ ਲਾਰੇ ਨਾਲ ਨਹੀਂ ਹੁਣ ਸਰਦਾ ਹੈ'|
ਕਬਰਾਂ ਵਰਗੀ ਖਾਮੋਸ਼ੀ ਹੈ ਮਨ ਅੰਦਰ ,
ਚਿਹਰੇ ਉੱਤੇ ਰੌਣਕ ਦਾ ਬਸ ਪਰਦਾ ਹੈ |
ਖੌਰੇ ਅੰਦਰ ਕਿੰਨੀਆਂ ਪਰਤਾਂ ਫੋਲ ਗਿਆ ,
ਨੈਣਾਂ ਵਿਚ ਜੋ ਖਾਰਾ ਅਥਰੂ ਤਰਦਾ ਹੈ |