ਦੁਨੀਆਂ ਸੱਚ ਆਖਦੀ ਹੈ .....

 ਦੁਨੀਆਂ ਸੱਚ ਆਖਦੀ ਹੈ ........

ਇੱਕ ਪੰਨੇ ਦੇ ਦੋ ਪਾਸੇ ਹੁੰਦੇ ਨੇ

 ਤੇ ਅਸਾਡੀ ਸਾਂਝ ਦਾ ਵੀ 

ਅਸਲੋਂ ਇੱਕ ਪੰਨਾ ਹੈ

 ਜਿਸਦੇ ਇੱਕ ਪਾਸੇ  ਲਿਖਿਆ ਹੈ

 ਇਤਬਾਰ,ਪਿਆਰ ਤੇ ਅਸੀਂਮ ਸਤਿਕਾਰ

ਤੇ ਦੂਜਾ ਪਾਸਾ ,,,,,,

ਬਿਲਕੁਲ ਕੋਰਾ, ਸੱਖਣਾ , ਸਫੇਦ

 ਜਿਸ ਤੇ ਓਹ ਹਾਂ ਵੀ ਲਿਖ ਸਕਦਾ ਹੈ ਤੇ ਨਾਹ ਵੀ ......

.ਤੇ ਉਸਦੀ ਹਾਂ ਅਤੇ ਨਾਂਹ ਦੇ ਵਿਚਕਾਰ

 ਲਟਕਦੀ ਹੈ ਜਿੰਦ ਸੂਲੀ ਤੇ

 ਡੱਕੇ ਡੋਲੇ ਖਾਂਦੀ ...

ਨਿੱਤ ਸੁਫ਼ਨੇ ਵੇਖਦੀ 

ਇਹ ਵੀ ਜਾਣਦੀ

ਕਿ  ਸੁਫ਼ਨਿਆਂ ਦਾ ਤਾਂ ਕੰਮ ਹੈ

 ਬੰਦੇ ਨੂੰ ਸੱਚ ਨਾਲੋਂ ਤੋੜੀ  ਰੱਖਣਾ..... 

ਪਰ ਪਤਾ ਨਹੀ ਕੀ ਝੱਲ ਹੈ........

ਹੁਣ ਤਾਂ ਸੋਚ ਵੀ 

ਜਿਊਂਦੀ ਹੈ  ਭਰਮ ਵਿਚ

 ਖਲ਼ਾਅ ਵਿਚੋਂ ਗੁੰਮੀਆਂ ਰੀਝਾਂ ਤਲਾਸ਼ਦੀ

ਆਪਣੇ ਆਪ ਨਾਲ ਸੰਵਾਦ ਰਚਾਉਂਦੀ

 ਆਪਣੇ ਆਪ ਨੂੰ ਵਿਸ਼ਵਾਸ ਦਵਾਉਂਦੀ

 ਕਿ  ਵਕ਼ਤ ਆਵੇਗਾ

ਤੇ ਮੇਰੀ ਬਾਬਤ 

ਬੰਨ੍ਹੀ ਗੰਢ ਦੀ ਤਣੀ ਢਿੱਲੀ ਕਰ ਕੇ

 ਸ਼ਬਦਾਂ ਵਿਚ ਰਸ ਭਰ ਕੇ

ਉਹ ਹੌਲੀ ਜਿਹੀ ਕਹੇਗਾ

'' ਮੈਂ ਤੈਨੂੰ ਬਹੁਤ ਪਿਆਰ ਕਰਦਾਂ ਬੈਲੀ ''

ਪਰ  ਭਰਮ ਕਦੀ ਸੱਚ  ਨਹੀ ਹੁੰਦੇ 

ਅਕਸਰ ਰਸਤੇ  ਭੁਲਾ  ਦਿੰਦੇ ਨੇ

  ਦੁਨੀਆਂ ਸੱਚ ਆਖਦੀ ਹੈ

  ਦੁਨੀਆਂ ਸੱਚ ਆਖਦੀ ਹੈ ।............

ghazal....

ਜਿਸਨੂੰ ਹਬੀਬ ਸਮਝਿਆ ਅਪਣਾ ਜਹਾਨ ਵਿਚ ।
ਗ਼ਮ ਬੇਸ਼ੁਮਾਰ ਦੇ ਗਿਆ ਮੈਨੂੰ ਉਹ ਦਾਨ ਵਿਚ ।


ਆਈ ਹੈ ਸਿਰਫ਼ ਦਰਦ ਨੂੰ ਹੀ ਰਾਸ ਇਹ ਜਗ੍ਹਾ ,
ਰੁਕਿਆ ਨਾ ਹੋਰ ਕੋਈ ਵੀ ਦਿਲ ਦੇ ਮਕਾਨ ਵਿਚ ।

ਇਤਬਾਰ ਕਰਕੇ ਜਾਲ਼ ਵਿਚ ਫ਼ਸ ਜਾਇਉ ਨਾ ਕਿਤੇ,
ਹੱਦੋਂ ਹੀ ਵੱਧ ਮਿਠਾਸ ਹੈ ਉਸਦੀ ਜ਼ੁਬਾਨ ਵਿਚ ।

ਆਵੇ ਨਾ ਪੈਰਾਂ 'ਤੇ ਕਦੇ ਇਸਦਾ ਮਧੋਲਿਆ ,
ਮੰਦਾ ਕਹੀਂ ਨਾ ਕੁਝ ਵੀ ਤੂੰ ਵੇਲੇ ਦੀ ਸ਼ਾਨ ਵਿਚ ।

ਚਿਹਰੇ 'ਤੇ ਬਸ ਨਕ਼ਾਬ ਹੈ ਬਖਸ਼ੰਦ ਹੋਣ ਦਾ ,
ਮਾਫ਼ੀ ਦਾ ਸ਼ਬਦ ਪਰ ਨਹੀ ਤੇਰੇ ਵਿਧਾਨ ਵਿਚ ।

ਮੈਂ ਲਰਜ਼ਦੀ ਇਕ ਬੂੰਦ ਹਾਂ ਕੋਈ ਨਦੀ ਨਹੀਂ ,
ਸ਼ਿੱਦਤ ਤੂੰ ਅਪਣੀ ਪਿਆਸ ਦੀ ਰੱਖੀਂ ਧਿਆਨ ਵਿਚ ।

ghazal....

ਬਾਹਰ ਸੁੰਨਾਪਨ ਹੈ ਉਜੜੀ ਗੋਰ ਜਿਹਾ ।
ਮਨ ਦੇ ਅੰਦਰ ਰਹਿੰਦਾ ਹੈ ਪਰ ਸ਼ੋਰ ਜਿਹਾ ।

ਚਾਨਣ ਦਾ ਮੁੱਲ ਇਹਦੇ ਕਰਕੇ ਹੈ ਜੱਗ 'ਤੇ ,
ਦਿਸਦਾ ਹੈ ਇਹ ਨੇਰ੍ਹਾ ਜੋ ਮੁੰਹ -ਜ਼ੋਰ ਜਿਹਾ ।

ਮਾਣ ਕਰੀਂ ਨਾ ਟੁੱਟ ਜਾਣਾ ਹੈ ਇਸਨੇ ਵੀ ,
ਸਾਹਾਂ ਵਾਲਾ ਰਿਸ਼ਤਾ ਕੱਚੀ ਡੋਰ ਜਿਹਾ ।

ਸੱਚ ਕਹਿਣ ਤੋਂ ਅਕਸਰ ਰੋਕੀ ਜਾਂਦਾ ਹੈ ,
ਮਨ ਵਿਚ ਬੈਠਾ ਜੋ ਹਉਮੈ ਦਾ ਚੋਰ ਜਿਹਾ ।

ਧੜਕਣ ਬਣ ਕੇ ਸਾਹਾਂ ਵਿਚ ਤੂੰ ਵਸਦਾ ਸੀ ,
ਪਰ ਹੁਣ ਜਾਪੇਂ ਮੈਨੂੰ ਅਸਲੋਂ ਹੋਰ ਜਿਹਾ ।

ghazal...

ਦਿਲ ਬੜਾ ਲਾਚਾਰ ਹੈ ਤੇਰੇ ਬਿਨਾ ।
ਜ਼ਿੰਦਗੀ ਦੁਸ਼ਵਾਰ ਹੈ ਤੇਰੇ ਬਿਨਾ ।

ਨੇੜਤਾ ਤੇਰੀ ਰਹੀ ਨਾ ਦੋਸਤੀ ,
ਸੁੰਨਾ ਜਿਉਂ ਸੰਸਾਰ ਹੈ ਤੇਰੇ ਬਿਨਾ ।

ਛਾਨਣੀ ਦਿਲ ਹੋ ਗਿਆ ਦੁੱਖ ਜਰਦਿਆਂ,
ਕੋਈ ਨਾ ਗ਼ਮਖਾਰ ਹੈ ਤੇਰੇ ਬਿਨਾ ।

ਮੇਰੇ ਵਿਹੜੇ ਹੁਣ ਵੀ ਆਉਂਦੀ ਹੈ ਬਹਾਰ ,
ਮਹਿਕ ਵੀ ਪਰ ਭਾਰ ਹੈ ਤੇਰੇ ਬਿਨਾ ।


ਧੂੰਏਂ ਵਾਂਗੂੰ ਉੜ ਗਈ ਫੁੱਲਾਂ ਦੀ ਆਬ ,
ਸੜ ਰਹੀ ਗੁਲਜ਼ਾਰ ਹੈ ਤੇਰੇ ਬਿਨਾ ।

ਹਿਜਰ ਦੀ ਇਸ ਖੇਡ ਦੇ ਵਿਚ ਦੋਸਤਾ ,
ਹਾਰ ਹੀ ਬਸ ਹਾਰ ਹੈ ਤੇਰੇ ਬਿਨਾ ।