ਦੱਸ ਦਿੰਦੀਆਂ ਨੇ ਦਿਲ ਦੀ ਹਾਲਤ ਅੱਖਾਂ ਪਲ ਵਿਚ ਰੋ ਕੇ
|ਬੇਸ਼ੱਕ ਜਿੰਨਾ ਮਰਜ਼ੀ ਰੱਖੀਏ ਦਿਲ ਦਾ ਦਰਦ ਲੁਕੋ ਕੇ |
ਚਾਨਣੀਆਂ ਰਾਤਾਂ ਵਿਚ ਮੇਰੇ ਸੀਨੇ ਲੱਗ ਕੇ ਰੋਵੇ ,
ਜਿਹੜੀ ਪੌਣ ਮੇਰੇ ਵੱਲ ਆਵੇ ਤੇਰੇ ਦਰ ਤੋਂ ਹੋ ਕੇ |
ਇਕ -ਇਕ ਕਰਕੇ ਨੈਣਾਂ ਵਿੱਚੋਂ ਡਿੱਗੇ ਹੰਝੂ ਬਣਕੇ ,
ਰੱਖੇ ਸੀ ਜੋ ਪਲਕਾਂ ਉੱਤੇ ਸੁਫ਼ਨੇ ਅਸੀਂ ਸੰਜੋ ਕੇ |
ਰੌਣਕ ਵਿਚ ਵੀ ਸਾਥ ਨਿਭਾਇਆ ਦੁੱਖਾਂ ਨੇ ਹੀ ਮੇਰਾ,
ਖ਼ੁਸ਼ੀਆਂ ਨੇ ਤਾਂ ਗਲ ਨਾ ਕੀਤੀ ਦੋ ਪਲ ਕੋਲ ਖਲੋ ਕੇ ।
ਤੇਰੇ ਬਾਝੋਂ ਮੇਰੀ ਹਾਲਤ ਹੋਈ ਹੈ ਕੁਝ ਐਸੀ,
ਤਿਤਲੀ ਰੱਖੀ ਹੋਵੇ ਜਿੱਦਾਂ ਸੂਲ਼ਾਂ ਵਿੱਚ ਪਰੋ ਕੇ |
No comments:
Post a Comment